تبلیغات
ائله بئله - مطالب خرداد 1395
ائله بئله
صفحه نخست       پست الکترونیک          تماس با ما              ATOM            طراح قالب
گروه طراحی قالب من گروه طراحی قالب من گروه طراحی قالب من گروه طراحی قالب من گروه طراحی قالب من

بو تئزلیگه آچیلیشینا تانیق اولاجاغیمیز؛
صادقیه بوزلاغی 
صفوی دؤرونه عاید اولان تبریز بازاری‌نین «صادقیه بازاری» مجموعه‌سینده یئر آلان صادقیه بوزلاغی (یخچال صادقیه)، 28 بایرام آیی (اسفند) 1385-ده، 18917 ثبت نؤمره‌سی ایله، ایرانین ملی اثرلری سیراسیندا ثبته یئتیریلیب.
تبریزین اؤنم داشییان بوزلاقلاریندان ساییلان صادقیه بوزلاغی، 2000 مترمربع‌لیک وسعت ایله قاجار دؤرونون ده مهم بوزلاقلاریندان ساییلیرمیش...








نوع مطلب :
برچسب ها :
لینک های مرتبط :
          
جمعه 28 خرداد 1395

کولتور انسان یاپیتی (اثری)دیر
کولتور، انسانین بیولوژیک اولاراق دئییل، سوسیال اولاراق قوشاقدان- قوشاغا کؤچوردویو مادی و مادی اولمایان اورون‌لرین (محصول‌لارین) بوتونودور.
گونلوک دیل‌ده "کولتورلو اولماق" بیلگیلی، گؤرگولو، نزاکت‌لی اولماق آنلامینا گلیر. کولتورلو آدام اویقارلیغین (مدنیتین) نعمت‌لریندن بیلینج‌لی (شعورلو) اولاراق استفاده ائله‌ین ائییتیملی (تحصیلات‌لی) آداما دئییلیر.
کولتور تئرمینی‌نی، گونوموزده‌کی معناسینا یاخینن بیر شکیلده ایلک دفعه 17-نجی یوزایلده ساموئل وَن پوفئندورف قوللانمیش‌دیر. اونون دئدییینه گؤره، کولتور طبیعته قارشیت اولان و بللی بیر توپلومسال یاتاق ایچینده میدانا چیخان بوتون انسانی اثرلر‌دیر.
بیر توپلومون تاریخی سوره‌ج (روند) ایچینده ایجاد ائتدییی و قوشاق‌دان- قوشاغا گؤتوردویو هر نوع مادی و معنوی اؤزه‌ل‌لیک‌لرین هامی‌سینا کولتور دئییلیر. کولتور، بیر توپلومون (جامعه‌نین) کیملییینی یارادار و اونو باشقا توپلوم‌لاردان فرقلی قیلار. کولتور، توپلومون یاشاییش و دوشونوش طرزی‌دیر. کولتور، عمومیت‌ده ایکی عنصردن اولوشور:
1- مادی کولتور عنصرلری: بینالار، هر نوع آراج-گره‌ج (ابزار و تجهیزات)، گئییم‌لر و س...
2- معنوی کولتور عنصرلری: اینانج‌لار، گله‌نک‌لر (سنت‌لر)، نورم‌لار (هنجارلار)، دوشونجه بیچیم‌لری و س...
کولتورون مادی و معنوی عنصرلری آراسیندا داواملی اولاراق بیر ائتکی‌لشیم (تعامل، قارشیلیقلی تاثیر) واردیر. بیرینده میدانا گلن بیر ده‌ییشیم او‌ بیرینی ده ائتکی‌لر. کولتور، توپلومون طبیعی چئوره‌سیندن، یعنی جغرافی شرایطیندن تاثیر آلیر. مثال اولاراق، داغلیق بؤلگه‌لرده یاشایان توپلوم‌لارین کولتورو ‌ایله وئریم‌لی اوووالاردا (دشت‌های حاصل‌خیز) یاشایان توپلوم‌لارین کولتورو بیری- بیریندن فرق‌لی‌دیر.
کولتور گؤره‌لی‌ (نسبی)دیر، یعنی هر توپلومون اؤزونه مخصوص کولتورو واردیر.کولتور تاریخ‌سل‌دیر، یعنی کئچمیش‌دن گونوموزه داوام ائتمکده‌دیر.کولتور دوراغان (ایستا، ثابت) دئییل، زامان ایچینده ده‌ییشر. مادی عنصرلر داها سرعت‌لی ده‌ییشر، آیریجا هر توپلوم‌دا کولتورل ده‌ییشیمین سرعتی بیری- بیریندن فرق‌لی‌دیر. کولتور انسان یاپیتی (اثری)دیر، انسان‌لار هم کولتورو اولوشدورورلار (ایجاد ائدیرلر)، هم ده کولتور‌دن تاثیرلنیرلر.

«باش یازار»
az.sancaq@gmail.com









نوع مطلب :
برچسب ها :
لینک های مرتبط :
          
شنبه 22 خرداد 1395
ایواز طاها- دان سئچیلمیش سؤزلر

اینسانین دوشونجه‌سی دیلده باش وئریر. هابئله، اینسانین وارلیغی دیلده گئرچکلشد‌ییی زاماندان او، باشقا جانلی‌لاردان سئچیلمه‌یه باشلاییر. ارسطو اینسانین حئیوان‌لارا اوستونلویونون باشلیجا ندنینی “نیطق”ده گؤردوکده یانیلمیر.

*قاپالی توپلوم استعاری (یعنی شعر دیلی ایله) دانیشیر، آچیق توپلوم ایسه، مجازی. بیز استعاری دانیشیقدان مجازی دانیشیغا کئچمه‌لی‌ییک.

*صنعتین باشلیجا گؤره‌وی بیلگیلندیرمک دئییل، ائتکیلندیرمک‌دیر. مسئله بوراسیندادیر: یاشامین آرخاسیندا حقیقی دنیا یوْخ‌دور، حقیقت یاشامین اؤزونده‌‌دیر. صنعت اوْلای اوْلاراق یاشامی یارادیرسا، دئمک حقیقت ده اوْنون تؤره‌مه‌سی‌دیر.

*تاریخه جنسییت گؤزویله باخارکن بونو آیدین گؤروروک:‌ قادین، کیشی­‌لرین گؤزونده دوغانین سیمگه­‌سینه چئوریلیر. اینسان، دوغانی [طبیعتی] جایناغینا آلیر، کیشی ایسه قادینی. بونون اوزون کئچمیشی وار. قادین، نئجه دئیه‌رلر، اؤزونون دوغال کیم‌لییی ایله تاریخین یئتیرمه­‌سی­‌دیر؛ قادین وارلیغینا گؤز یومولموش کیشی‌لرین تاریخی.

*بیز باشقا بیر دیلده کایناتدا اولدوغوموزو، وارلیغیمیزین ائوینده اولدوغوموزو حیس ائده بیلمه‌ریک. بو یالنیز آنا دیلینده باش وئره بیلر 

*اونوتمایالیم: یاشام گله‌جک کیمی‌دیر، اؤنجه‌دن یارانماییب، اوْنو عمل‌لریمیزله یارادیریق. یاشام وئریلمیش دئییل، اؤنجه موجودیتی یوْخ‌دور، لحظه‌ده یارانیر. یاشامین مادی گوجو بیلیمده، فلسفه‌ده، صنعت‌ده‌دیر.

*منجه، آنالیق قادینین لذذت آلدیغی بیر وظیفه‌دیر، آمما کیشی­‌لر بو وظیفه­‌نی ایسته­‌نیلن قده­‌ر قودساللاشدیراندا، سانکی بونو دئمک ایسته‌­ییرلر: سن اوتور اوشاق دوغ، من توپلومو یؤنه‌ته‌جه‌یم. 

*دیل دوشونجه‌نین آنلاتیم اورتامی، بیچیمی، ظرفی کیمی نظرده توتولسا بیله، اینسان وارلیغی‌نین آنلامی دوشونجه‌دن دئییل، اوندان آسیلی‌دیر.

*تک‌سسلی شعر بوتون سس‌لری باتیرماق ایسته‌ییر. دئوریم، اوشاق‌لارینی اودور. چوْخ‌سسلی شعر ایسه دیره‌نیش اوْجاغینا سو جالاییر. 

*دیل مسئله‌سی آزساییلی سؤزلرله ساهمانا سالیناسی دئییل. دیل دالغالی، اوج- بوجاقسیز بیر دنیزدیر.

*ادبیات، شعرله نثردن اولوشور. آنجاق توپلومدا تکجه شعر یازیلیرسا، دئمک، توپلوم گئری قالیب.

*دیلی گلیشدیریب زنگین‌لشدیرمکده باش ووراجاغیمیز بیرینجی خزینه قوتادغو بیلیک، دیوان-ی- لوغات التورک و دده قورقود کیمی اثرلردیر. اوسته گل فولکلور و شیفاهی دیلی. لاکین علمی و فلسفی دیلین احتیاج‌لاری باخیمیندان بونلارداکی سؤز داغارجیغی اولدوقجا کیچیک‌دیر. بونا گؤره سؤز تؤرتمک قاچیلمازدیر.

 

 

 





نوع مطلب :
برچسب ها :
لینک های مرتبط :
          
جمعه 21 خرداد 1395

7-نجی «سانجاق»دا یاییملانان ساتیرا:

«5 اوشاغین اولسا شریف-دن قبولسان!»



اون ایلین عرضینده (1385-1394) ایراندا بیر میلیونا یاخین 15 یاشی دولدورمایان اوشاق ائوله‌نیبدی. اوست- اوسته ایراندا یاش باخیمیندان ائولنمه‌یه هئچ بیر یاساقلیق یوخدو. یالاندان تصویب اولان بالاجا قانونلار دا ائتکی سیزدیلر؛ اصلن تحریم قانون‌لارینی دؤر ووران میللته بو قانون‌لار کار وئرمزلر. 1394-جو ایلده 40 مین اوشاق قوناق-باجی اوینوندا یوخ بلکه حقیقی اویوندا ائوله‌نیبلر یانی آمارلاردا اولان هر ساعاتدا 80 ائولنمکدن تقریبن 5 دنه‌سینده، ان آزی طرف‌لرین بیری قوناق- باجی اوینوندان دوروب گلیب ائوله‌نیبدی. کئچن ایل 1500 -دن آرتیق قیز اوشاغی، اوشاق صاحیبی اولوبلار و ائله او سایدا دا بوشانیب دول اولوبلار. استثنا اولاراق بو قونولاردا رکورد ایرانین الینده دئییل آسیانین گونئیی  و آفریقا اؤلکه‌لری ایرانین اوزونو آغاردیبلار. البته ایرانین آمارلاری پیس دئییل؛ اول الله مسئول‌لار دا سس‌سیز دئییل‌لر و ملت ایله بیرلیکده آند ایچیبلر ایران آدینی دال قاپیلاردان اوجالتسینلار.

ایرانین جمعیتی 80 میلیونو آشیریبدی؛ بو رقم بیر سیرا مسئول‌لاری راضی سالمیر آخی اونلار  جمعیتین ایکی قات اولماغینی ایستیرلر یانی صؤحبت 150 میلیوندان گئدیر.

۵ میلیون معتاد، ۱۰ میلیون ایش‌سیز و بو مدل دال قاپی رکوردلاری بو مسئول‌لارا قانیق وئرمیر، اونلار یوخاری رکوردلارین فیکرینده‌دیلر. ایل‌لر "ایکی اوشاق یئتر" دئین‌لر، بو گون‌لر ان آزی 5 اوشاقدان دانیشیرلار.

دولت اوشاقلی عاییله یاراتماق اوچون هر ایشه ال آتیر و چوخلو طرح‌لر ده تصویب ائدیر؛ مسئول‌لار دئییرلر ایش یوخدو، اولسا دا ائولی‌نین‌دی، بویلو خانیما بیر عؤمورلوک مرخصی وار و ائولی‌لر 3 آی آز عسگرلیک ائده‌جکلر. هله هر اوشاغا دا 3 آی چیخیلاجاق یانی بیر نفرین 6 اوشاغی اولسا عسگرلیک یئرینه اوشاق بؤیوده‌جکدی. عسگرلییه گئدن اوغلان‌لارین چوخو 18 یاشدادیلار و خانیملاری دا ائله 15 یاشلی.

دولت اوشاق باغچالاریندان توت گئت قوجا لاراجان پلانی وار؛ هر کس ایله اؤز دیلینده دانیشیر.

ایراندا ایدماندان باشقا هر نه‌یین اوستونده بینه‌دن ایشلیر؛ ائولنمه‌یین یاشینی اوشاق باغچالارینا هابئله اعتیادی ۱۰یاشا و ایشسیزلییی ایسه ۱۳ یاشا یئندیریبلر . آموزش پرورش-ین ده بئله طرح‌لری اولا بیلر. مثال اوچون کنکوردا هر اوشاق 20% ساییلسین یانی 5 اوشاغین اولسا شریف-دن قبولسان. چوخ دا گؤزل طرحدی!

 





نوع مطلب :
برچسب ها :
لینک های مرتبط :
          
جمعه 21 خرداد 1395

 انسان/ دیل/ آنا دیلی

مدرن انسانین جسارتی، بیلیم (علم) قامچیسی ایله بوتون بشریت تاریخینی آیاغا قالدیرار، دیل آچدیرار، دانیشماغا مجبور ائدر. هر بیر هیروگلیف لؤوحه‌سی، یا میخی لؤوحه‌لر انسانین درین باخیش‌لاری و کسین ایسته‌یی گوجویله دانیشمالی، گیزلرینی (رازها) آشکارا چیخارتمالی‌دیرلار. او، داش- قایا تیکه‌لرینده، یا خیریم- خیردا کاغیذ پارچالاریندا یازیلان هر بیر اونودولموش دیلی اوخویوب، سیرلارینی آچمالی‌دیر. اونون اؤنونده آغزی مؤهورلو هئچ بیر شئی قالمامالی‌دیر، چونکو او، گیزلری آچان، سیرلاری ایشیغا چیخاردان انسان‌دیر.

دیل، معظم بیر بینا، تاریخسل بیر اولقودور. بیلینجلی (شعورلو) انسانین دیله اولان آراشدیریجی، ده‌یرلندیریجی و قورویوجو باخیشی،  بیلینجسیز انسانین اورکک و هراسان باخیشی ایله فرقله‌نر، چونکو دیلینی قورومایان، دونیاسینی ایتیرر.

آنا دیلی، انسانین مدنی ژئنی دئمک‌دیر. بو ژئن، چوخ قدیم‌لردن، بؤیوک- بؤیوک آتا-آنالاردان گلمه‌دیر. انسان، هله آنا قارنیندا ایکن، بوتون قانی و جانی‌ایله بو وارلیغی تانیر، اؤیره‌شیر، آلیشیر و منیمسه‌ییر.

 دانیشماق، سس ایله دوشونمک‌دیر. انسان دوشوندویونده، سس‌سیزجه اؤزو ایله دانیشیر دئمک. باشقا تهر دئمک ایسته‌سم، آغیز آچیب دانیشدیغیمیزدا، سسلی اولاراق دوشونوروک.

آنا دیلینده دانیشاندا، دیل و دوشونجه‌ آراسیندا دولایی‌سیز (مستقیم) بیر باغلانتی یارانیر. داها دوغروسو، اورک، دیل و دوشونجه آراسیندا ایچ- ایچه ایلیشگی‌لر اولوشور. چونکو آنا دیلی، یاشادیقلاریمیزی، دنه‌دیکلریمیزی (تجربه‌ها)، سینادیقلاریمیزی، دویدوقلاریمیزی... بَلله‌ییمیز (ذهنیمیز) و تینیمیزده (روحوموزدا) جانلاندیریر. هر بیر سؤزجوک ایله، درین دویغولار یاشاییب، سئوینیریک،‌ دؤیونوروک، اؤیونوروک، قایغیلانیریق، دؤزومسوزلشیریک یا دا دؤزوروک... سونرا، کؤنلوموزده، بئینیمیزده یوغرولان سؤزلر جانلانینجا، دیله‌دیکلریمیزی دیله گتیریب، بوتون دویوب- دوشوندوکلریمیزی باشقالارینا آنلادیریق. دئمه‌لی، آنا دیلینده دانیشاندا، اورک، دوشونجه و دیل آراسیندا، انسانین طبیعته بوسبوتون اویغون اولان  اوچلو (سه‌گانه) بیر مکانیزم اولوشور.

بو اوزدن ایسه، آنا دیلی انسانین ایچ دونیاسینی آچان، انسانلیغین گرچه‌یینی سرگی‌له‌ین بیر آناآچار دیر. آنا دیلینده دانیشمایان‌لارین روحو دوستاق، وارلیغی بیلینمز، کیملیگی تانیماز قالار.


سوسن نواده‌رضی

az.sancaq@gmail.com

 





نوع مطلب :
برچسب ها :
لینک های مرتبط :
          
شنبه 15 خرداد 1395
6-نجی سانجاق-دا یازیلان باش سؤز:


بو ایلین ده یای تعطیل‌لری گلیب چاتماقدادیر. یئنه ده یئنی‌یئتمه‌لر و گنج‌لریمیز بوش واقت‌لارینی نئجه‌کئچیرده‌جک‌لرینی دوشونوب داشیناجاق‌لار. یئنه ده بوتون گؤزلر سوروملولارا (مسئول‌لارا) تیکیله‌جک؛ بلکه بو ایل، بو یای اوچون، دوغرو و اصول‌لو برنامه‌لر تؤکولوبدور...

بوش واقت‌لار (اوقات فراغت)، ایشسیز، گؤره‌وسیز، پروگرام‌سیز، رسمی اولمایان و... واقت‌لارا دئییلیر. بو آنلامدا، بوش واقت‌لار، انسان‌لارین هئچ بیر ایش عهده‌لنمه‌دیگی چاغ‌دیر. یعنی شخص، اوره‌یی ایسته‌دیگی ایشی گؤره بیلر.

سوسیولوق‌لارا (جامعه‌شناس) گؤره بوش واقت‌لارینی (اوقات فراغت) فایدالی و اولوملو (مطلوب) کئچیردن‌ انسان‌لارین، یاشام چئوره‌سینه باخیش‌لاری گوجلو و جانلی اولار. بوش واقت‌لارینی دوغرو بیر شکیلده مدیریت ائدن بیر شخص، اؤز باشاراجاق‌ و یئته‌نک‌لرینی (استعدادلارینی) علمی، عملی و جسمی باخیمیندان گلیشدیرر. دئمه‌لی بوش واقت‌لارین نئجه کئچیریلمه‌سی، شخصین اجتماعی- فرهنگی بویوت‌لارینی (ابعاد) ائتکیله‌یر، و بو واقتلارین فایدالی اولماسی، انسانلارین و دولایی‌سیله ده جامعه‌نین شعور و فیکیر آلیش‌وئریش سویه‌سینی آرتیرار. اوزمان‌لارین (متخصص‌لرین) چوخو، فراغت واقتلارینی یارادیجیلیغین، دوشونجه‌ چیچکلنمه‌سی‌نین، اختراع‌لارین، کشف‌لرین و یاشام‌گوجونون قایناغی ساییرلار.

حال حاضیردا یئنی یئتمه و جوان‌لاریمیزین چوخو، بوش واقت‌لارینی تلویزیون، ماهواره و کامپیوتر باشیندا کئچیردیرلر. بو مسئله اونلاری فردیت‌چی و چکینگن  ائله‌دیکدن باشقا، بیر چوخ انحراف‌لارا دا یول آچا بیلر. کامپیوتر اویون‌لارینداکی خشونت‌لر، اینترنت و چت‌لردن اخلاقسیزجا یارارلانماق‌لار جوان‌لارین ذهن‌لرینی اولومسوز ائتکیله‌مکدن و اونلارین بوش واقتلارینی هدره وئرمکدن علاوه، تعطیلاتدان سونراکی فعالیت‌لرینه و ائییتیم‌لرینه ده پیس تاثیر قویا بیلر.





جامعه‌لرده،  انسان گلیشیمی‌نین (توسعه‌ی انسانی) گؤسترگه‌سی اولان بوش واقت‌لارا، بیزیم جامعه‌میزده بیر مشکل اولاراق باخیلیر. حالبوکی، بو مسئله‌ ایله باغلی اولان بوتون قوروم و قورولوش‌لار (نهادها و سازمان‌ها)  اؤزلرینی مؤظف و بورجلو بیلسه‌لر، کسینلیک‌له عایله‌لرین بیر چوخ نیگارانلیق‌لاری، او جمله‌دن، برنامه‌سیزلیکدن و یا بودجه‌سیزلیکدن اولادلاری‌نین خطرلی داورانیش‌لارا مئیل ائتمه‌سی، بلاتکلیف قالماسی، یاشام‌لاری‌نین یارارلی ساعات‌لارینین هدره گئتمه‌سی... رفع اولاجاقدیر.

اؤیرنجی‌لرین، و عمومیتده بوتون انسان‌لارین بوش واقت‌لارینا ذیربط مقام‌لار طرفیندن هزینه اولونماییب، اویغون و فایدالی برنامه‌لر تؤکولمه‌سه، اجتماعی نورمسوزلوق‌لار (ناهنجاری) تاثیرینده قات- قات داها آرتیق هزینه‌لر جامعه‌یه تحمیل اولونار، و حتی بعضا جبران اولمایان چتین‌لیکلر یارانار.

بو اوزدن سوروملولاریمیز، اوشاقلار و جوان‌لارین بوش واقت‌لارینا داها آرتیق دقت یئتیرمکله، یای تعطیل‌لرینی فایدالی و تاثیرلی کئچیرمه‌لری اوچون عایله‌لره اولوملو و آزخرجلی برنامه‌لر ارائه وئرمه‌لی‌دیرلر.

سوسن نواده‌رضی

az.sancaq@gmail.com









نوع مطلب :
برچسب ها :
لینک های مرتبط :
          
شنبه 15 خرداد 1395

اؤلومسوز حوجره‌لر (سلول‌های جاودان)

60 ایل بوندان اؤنجه، 31 یاشی اولان هئنریتا لاکس قارین آغریسیندان دوکتورا گئتدیگینده، بیرگون هئلا (HELA) حوجره­‌لری‌نین قایناغینا چئوریله‌­جه‌­یینی عاغلینا بیله گتیره بیلمزدی. هئلا حوجره‌­لری، هئنریتا لاکس-ین حوجره­‌لری­نین، چئشیدلی آراشدیمالاردا ایشلنمک اوچون، آنالیز مرکزلرینده اکیلن بیر نسلی‌دیر. بو حوجره‌­لر آنالیز مرکزی اورتامیندا دیری قالان بیرینجی انسان حوجره‌­لری‌دیر. هئلا آدی، هئنریتا لاکسین آد و سوی‌­آدی­نین بیرینجی بؤلوموندن گؤتورولموش حرفلردن دوزه‌­لمیش­دیر.


 هئنریتا لاکس، 1951-نجی ایل‌لرده بالتیمور شهری اطرافیندا یاشایان بیر آمریکالی- اآفریقالی قادین ایدی. او بیرگون بالالیق کانسئرینه (سرطان رحم) توتولدوغونو آنلادی. هئنریتا درمان اوچون جونز هاپکینز خسته‌خاناسینا گئتدی. بو خسته‌خانا او بؤلگه‌­ده قارادریلی­‌لری قبول ائدن تکجه خسته‌­خانایدی. جونز هاپکینز خسته‌­خاناسیندا دوکتورلار هئنریتانین توموروندان اؤرنکلر گؤتوروب، بیر اؤرنک ده دوکتور جورج گای اوچون گؤندردیلر. دوکتور گای چوخدان ایدی انسان حوجره‌لرینی لابراتواردا بئجرتمه‌یه چالیشیردی، آنجاق بوتون حوجره‌­لر نئچه گون ایچینده اؤلوردورلر. دوکتور گای، هئنریتانین حوجره‌­لرینی بئجرتمه‌یه چالیشاندا باشا دوشدو کی، اونلارین بیر سیراسی، عادی حوجره‌­لر کیمی دئییرلر و یاشاماقلارینی داوام ائتدیریرلر. او بو حوجره‌­لری باشقالاریندان آییریب، اونلاری هئلا آدلاندیردی. ایندی 60 ایلدن سونرا دونیانین باشاباشیندا، بوتون لابوراتوارلاردا میلیاردلارجا هئلا حوجره‌­سی واردیر.

 

هئنریتا لاکس  ۴ آگوست ۱۹۵۱-نجی ایلده، دوققوز آی خسته‌­لیکدن سونرا اؤلدو. آنجاق اونون کانسئرلی حوجره‌­لری قالدیلار. او زاماندان ایندییه قدر هئلا حوجره­‌لریندن بیر چوخ اؤنملی دَنمه‌لرده (آزمایشات) یارالانیلیب‌دیر، آما نه هئنریتا نه ده اونون عائیله‌­سی­، اونون حوجره اؤرنه­‌یی‌نین (نمونه‌سی‌‌نین) دوکتور گایا گؤندریلمه‌­سیندن خبرلری اولمامیش‌دیر.

دوکتور گای، حوجره‌­لری ساتماق ایسته‌میردی، او ایلک باشیندان دا اونلاری پولسوز اولاراق، آراشدیرماجی­لارین اختیاریندا قویوردو. آما سونرالار بیر عده هئلا حوجره‌­لرینی بول ساییدا (عمده) اوره‌­دیب ساتماغا باشلادیلار. هئنریتانین حوجره‌­لری­نین بیر شوشه­‌سی 250 دولارا ساتیلدیغینا رغمن، اونون عائیله‌­سی تام یوخسول‌لوق ایچینده یاشاییردیلار!

هئلا حوجره‌­لری­نین بیلیمسل گلیشمه‌­لرده (پیشرفتهای علمی) بؤیوک و اؤنملی رولو اولموشدور. ویرولوژی قولو (گرایش ویروس‌شناسی) هئلا حوجره­‌لرینه چئشیدلی ویروس‌لار بولاشدیرماقلا یاراندی. کانسئرلی حوجره‌­لرین اوزای‌دا (فضادا) بیله دیری قالمالارینی ثبوت ائتمک اوچون، هئلا حوجره­‌لری اوزایا دا گؤندریلدی. هئلا حوجره­‌لری اولماسایدی، ایندی بلکه ژئنیتک علمی ده یوخ ایدی.

هئلا حوجره­‌لری­نین باشلیجا اثری، بلکه ده اوشاق ایفلیجی آشیسی (واکسنی)­نین کشف ائدیلمه‌­سی‌دیر. 50-نجی میلاد ایل‌لرینده آمریکادا اوشاق ایفلیجی اپیدئمی‌سی یاییلمیشدی، تکجه 1952-نجی ایلده 60. مین اوشاق بو خسته‌­لییه توتولموش­دو. بیر چوخ آراشدیرماجی (محقق) بو خسته‌لییه آشی کشف ائتمه‌یه چالیشیردیلار. ایلک اوشاق ایفلیجی‌نین آشیسینی کشف ائله‌ین جوناس سالک، اؤز آراشدیرمالاریندا هئلا حوجره‌لریندن یارارلانمیشدی.

گونوموزده آراشدیرماجی‌لار (محققان) بیر چئشیدلی دوروم‌لاردا، او جومله‌­دن کانسئر و پارکینسون خسته‌لیکلری‌نین داوالاری‌­نین تئستینده هئلا حوجره‌­لریندن یارارلانیرلار. حتی بزه‌­ک ملزمه‌­لری اوره‌دن (تولید ائله‌ین) شرکت‌لرین چوخو اؤز محصول‌لاری‌­نین یان ائتکی‌لرینی (عوارض جانبی) یوخلاماق اوچون بو حوجره‌­لردن فایدالانیرلار.

1970-نجی ایله کیمی هئنریتانین عائیله‌­سی­ هئلا حوجره‌­لریندن خبرسیز ایدی.  بو ایلده بیر نفر جونز هاپکین خسته‌خاسیندان هئنریتانین ارینه زنگ ووروب اونا دئدی، آروادی­نین حوجره‌­لری لابوراتوار لوله‌­لرینده دیری‌دیرلر. اونلار ایستیردیلر هئنریتانین اوشاقلاریندا کانسئر خسته­‌لیگی‌نین اولوب-اولمادیغینی بیلسینلر. هئنریتانین 5 اوشاغیندان هئچ بیرینده کانسئر یوخیدی. 

دوکتور گای و جونر هاپکینز خسته‌­خاناسی­نین باشقا آراشدیرماجی‌لاری هئلا حوجره­‌لریندن مادی قازانجلاری اولماسا دا، 1954-نجو ایلدن بری بو حوجره‌­لر و اونلالا ایلگیلی اوره‌تیم‌لر ساتیلماغا باشلادی. بونجا ایلده، هئنریتانین عائیله­‌سی هئچ بیر قازانج یئتیشمه‌ییب . اونلارین ساغلیق سیقورتالاری (بیمه‌ی درمانی) بیله یوخدور. هئنریتانین اوشاقلاری درس اوخوماغا بیله گوجلری چاتمیر، هامیسی­نین دا جسمی سورونلاری واردیر.

بو ایل آراشدیرماجی‌لار هئلا حوجره­‌سی­نین دی ان ائی دوزومونو  بللی ائده‌بیلدیلر. اونلار آراشدیرمالاری‌نین جماعته آچیقلادیلار. بو ایش لاکس عائیله­‌سی­نین غضبینه سبب اولدو. اونلارین ایسته­‌یی اوز‌ره، آمریکا ملی ساغلیق مرکزی بو بیلگی‌لره ال تاپماغی سینیرلادی (محدود ائله‌دی).

حاضیرلایان: ح.ا علیار





نوع مطلب :
برچسب ها :
لینک های مرتبط :
          
شنبه 15 خرداد 1395
SANCAQ 6 çıxdı
«سانجاق»-ین 6-نجی سایی چیخدی.
ایچینده‌کیلر:
آذربایجانین کولتور و کولتورچولویونون باش اوجالیغی:محمد علی خان تربیت
ایپک یولونون یئنی‌دن جانلاندیریلماسیا چین-ین اولوسلار آراسی دانیشمالاری
حیکایه‌نین بئش اساس عنصرو
تبریزین 7 عجایبی
هفته‌لیک فالینیز 
و...





نوع مطلب :
برچسب ها :
لینک های مرتبط :
          
جمعه 7 خرداد 1395


( کل صفحات : 2 )    1   2   


صفحات جانبی
آمار وبلاگ
  • کل بازدید :
  • بازدید امروز :
  • بازدید دیروز :
  • بازدید این ماه :
  • بازدید ماه قبل :
  • تعداد نویسندگان :
  • تعداد کل پست ها :
  • آخرین بازدید :
  • آخرین بروز رسانی :
امکانات جانبی