تبلیغات
ائله بئله - آیاقداییک «ساعات» کیمی، «ارک» کیمی
ائله بئله
صفحه نخست       پست الکترونیک          تماس با ما              ATOM            طراح قالب
گروه طراحی قالب من گروه طراحی قالب من گروه طراحی قالب من گروه طراحی قالب من گروه طراحی قالب من

اسماعیل جمیلی

یاشام دنیزینده عؤمروموز هر آن
گونلرین چورودور قوجا ساحیلده
آردی کسیلمه ین چرپینتیلاردان
دیلسیز بیر یورغونلوق قالیر کؤنولده


اَییلیر اؤنونده اسن یئللرین

حسرت یوکلندیکجه آرزو یئلکنی
دوراقسیز یوللارا تیکیر گؤزونو
بوراخا بیلمه ییر یوزلر " بلکه" نی

یالنیز اومودلاردیر سئوگی یولوندا
سایرشیر اوزاقدان بیر اولدوز کیمی
یاپیشیر الیندن یورغون حیاتین
سئوینجی پایلاشیر گولر اوز کیمی

رضی

یاشام ایستمه‌دیگیمیز بیر آرزو

قضا ایله  بویوموزا بیچیلمیش

گؤرن نه اؤلچویله کیمین الیله

بو اویوندا اویونچولار سئچیلمیش؟


عؤمرون کامانیندا «بلکه»‌لر اوخدور

تاخیلسا، باشاریقلاری یارالار

ایلیشنده شبهه یئلی اوره‌یه

آماجلارین آیدینلیغین قارالار



اوزلر گولور، اوره‌ییمیز آغلاییر

اومود جیلیزلاشیر اورمو گؤلو تک

حیاتین آنلامین بوروشدوروبلار

بو گونلرده هاممی یاشیر اؤلو تک


اسماعیل جمیلی

نه یاخشی کی، زامان آخیر دورمادان

یالانلار چورویور، گولور دوغرولار

ایشیغا یئنیلیر قارانلیق دالان

اورتادا کیمسه سیز قالیر اوغرولار

 

رضی

نه یاخشی کی، اینانیریق سحره

اینانجیمیز اورکلره سو سپیر

قارانلیق گئجه‌نین آردیندان اومود

گون چیخاندا گلیب آرزونو اؤپور

 

اسماعیل جمیلی


دالغالار دنیزی توتور آیاقدا

چیرپینتی قویماییر سولار قوخوسون

دایانیش یورویوش آخار زاماندا

اویغویا جومانین پوزور یوخوسون


 

رضی

آیاقداییک ساعات کیمی، ارک کیمی

کول آلتیندا کؤزرن کؤزوموز وار   

آلنی آچیق باشی اوجا تبریزین

بؤیوک یارینلاریندا گؤزوموز وار

 

اسماعیل جمیلی

نیفرتله بسله نن کینه کروانی
زمانلا آخساییر یوخلوغا یورور
سئوگینین سئودانین ایپک قانادی
وورغونلار قاطارین سحره سورور

 

گؤزو دار قیسیرلار بیزی دانسادا
هورولمز گونشین اؤنونده دووار
قارا قیش قودوروب سزاق چالسادا
گول له نر باغچامیز گولنده باهار

رضی

 

بو دنیادا نه چوخ ظالیم ظولم ائدیب

باغیرمیشیق «بیز ظولومدان بئزاریق»

صاف اورکده سئوگیلر بسله‌سک ده

هیم بیر اولوب «درین قویو قازاریق»


چؤلده بیتیب لاله سونبول یان- یانا

یاللی گئدیر چیچک دولو آغاجلار

داغ دا داش دا باشین یئردن قووزاییر

دئییرلر کی دوغرولاجاق آماجلار

 


 


اسماعیل جمیلی

نه گؤزه لدیر دوغما سئودا سازیندا
یئنی دوغوش هاواسینین ناخیشی
وار اولمانین دورو آینا باغیندا
بویالارین اینجه اینجی یاغیشی


نه گؤزه لدیر دویغولارین دالیندا
یئنیلشمک گله جگه زوغ آتماق
دوغما دیلک دنیزینده چاغلاییب
یارینلاری محببتله یاراتماق


رضی

گؤی قورشاغی کوسوب کؤچوبدور بوردان

بیزده  یاشام یالنیزجا آغ- قارادیر

اوجالسا دا خیالیمیز زیروه‌یه

روحوموزون قول قانادی یارادیر


بوردا یاشام اورالارا بنزه‌مز

بیز یاشامی گونده یوز یول اؤلوروک

بیر توخوم اکمیشیک جوجرسین دئیه

اومودو قوربان کسیریک، بؤلوروک



اسماعیل جمیلی:

سیغیشمیشیق سئوگیمیزین مولكونه
یاشام بویدا نیسگیلیمیز اولسادا
اومودلانیب یازلانیریق چاره سیز
آرزی گولو آچیلمادان سولسادا

رضی:

یار یولداشلار بوتون قویوب گئتدیلر

تبریز ایندی غربت بویدا غربتدیر

اورکلر بیر چیرپینماییب چالمسا

آرزو دیلک قورو سؤزدور صحبت دیر

اسماعیل جمیلی:
یوللار یاری آیرمازدیر یاریندان
سئوگی ائوی كؤچولمه ین وطن دیر
وورغون كؤنول آیریلیقدا وصالین
خیالیله دیریلن دیر اؤلن دیر

رضی:

غربتده سورگونوک، وطنده توتساق

تخت یاراتدیق، بختی یارادانمادیق

ائنیش یوخوشلو یوللاردان گئچسک ده
هئچ بیر زامان، دوشمانلارا قانمادیق.



 

اسماعیل جمیلی:

وارین وئرن اوتانمازمیش دئمیشلر
جاندان عزیز نه واردیر كی وئرمهدیك
سارالیب سوورولوب سورگون دوشسكده
هپ دیرندیك ازیك عومور سورمهدیك

رضی:

قارا گونون عؤمرو آزدیر دئمیشلر

صبر ائلهسن حالوا پیشر قورادان

هر ائلین بختینه بیر پای دوشوبدور

بیزلره ده غیرت وئریب یارادان

اسماعیل جمیلی:

بیزی بیزدن آلانمادی اؤزگهلیك
ائنیش یوخوش یوللار بیزی یورسا دا
"
ایاقداییق ساعات كیمی ارك كیمی "
باغچامیزی یابان خزان وورسا دا

رضی:

تاریخیمیز ایتیب باتدی، تالاندی

نهلر گلدی نه لر گئچدی کیم بیلیر؟

«هپ دیرندیك ازیك عؤمور سورمهدیك»

نه یاشاندی، نهلر اولدو، کیم بیلیر؟

 






نوع مطلب :
برچسب ها :
لینک های مرتبط :
          
شنبه 5 اردیبهشت 1394
یکشنبه 6 اردیبهشت 1394 03:32 ب.ظ
 
لبخندناراحتچشمک
نیشخندبغلسوال
قلبخجالتزبان
ماچتعجبعصبانی
عینکشیطانگریه
خندهقهقههخداحافظ
سبزقهرهورا
دستگلتفکر





صفحات جانبی
آمار وبلاگ
  • کل بازدید :
  • بازدید امروز :
  • بازدید دیروز :
  • بازدید این ماه :
  • بازدید ماه قبل :
  • تعداد نویسندگان :
  • تعداد کل پست ها :
  • آخرین بازدید :
  • آخرین بروز رسانی :
امکانات جانبی